'ഓസ്ട്രേലിയ മുഴുവനും, ഇന്ത്യ മുഴുവനും അതിനേക്കാള് പ്രധാനമായി നിങ്ങളുടെ കുടുംബവും നിങ്ങളുടെ പരിശ്രമത്തില് വളരെ അഭിമാനത്തിലാണ്'; ഓസ്ട്രേലിയയില് ജോലി ചെയ്യുന്ന മലയാളി നഴ്സിനെ നന്ദി പറഞ്ഞ് ആദം ഗില്ക്രിസ്റ്റ്; വീഡിയോ
ഓസ്ട്രേലിയയില് ജോലി ചെയ്യുന്ന മലയാളി നഴ്സിനെ അഭിനന്ദിച്ച് മുന് ഓസ്ട്രേലിയന് വിക്കറ്റ് കീപ്പര് ആദം ഗില്ക്രിസ്റ്റ്. കോട്ടയം സ്വദേശിനിയായ ഷാരോണ് വര്ഗീസിനെയാണ് ഇദ്ദേഹം അഭിനന്ദിച്ചത്. ഓസ്ട്രേലിയയിലെ വൊലൊങ്ഗൊങിലെ കെയര് ഹോമിലെ നഴ്സാണിവര്. കോവിഡ് പ്രതിസന്ധിക്കിടയിലും വയോധികര്ക്കുള്ള കെയര് ഹോമില് ജോലി തുടര്ന്നതിലാണ് ഇവരെ അഭിനന്ദിച്ചത്.
'നിങ്ങളുടെ നിസ്വാര്ത്ഥമായ പ്രവൃത്തിക്ക് അഭിനന്ദനങ്ങള് ഷാരോണ്, നിങ്ങള് ആ സമയം (കോവിഡ് വ്യാപനകാലം) മുഴുവനും പ്രായമായര്ക്കുള്ള കെയര് ഹോമില് ജോലി ചെയ്യുകയായിരുന്നു'- ആദം ഗില്ക്രിസ്റ്റ് പറഞ്ഞു. 'ഞാന് നിങ്ങളെ അറിയിക്കുന്നതെന്തെന്നാല് ഓസ്ട്രേലിയ മുഴുവനും, ഇന്ത്യ മുഴുവനും അതിനേക്കാള് പ്രധാനമായി നിങ്ങളുടെ കുടുംബവും നിങ്ങളുടെ പരിശ്രമത്തില് വളരെ അഭിമാനത്തിലാണ്'- ആദം ഗില്ക്രിസ്റ്റ് വീഡിയോയില് പറയുന്നു. ഓസ്ട്രേലിയന് ട്രേഡ് ആന്ഡ് ഇന്വെസ്റ്റ്മെന്റ് കമ്മീഷന് ഇറക്കിയ വീഡിയയോയിലാണ് ആദം ഗില് ക്രിസ്റ്റിന്റെ പ്രതികരണം.
കോട്ടയം സ്വദേശിയാണ് ഷാരോണ് വര്ഗീസ്. താരത്തിന്റെ വീഡിയോ കണ്ടെന്നും അദ്ദേഹത്തിന്റെ സന്ദേശത്തില് നന്ദിയുണ്ടെന്നുമാണ് ഷാരോണ് പ്രതികരിച്ചത്. ആശുപത്രിയില് ജോലി ചെയ്യാനായായിരുന്നു ആഗ്രഹം. എന്നാല് കെയര് ഹോമില് അവസരം ലഭിച്ചപ്പോള് അങ്ങോട്ട് മാറുകയായിരുന്നുവെന്നും അവര് പറഞ്ഞു.